vnnd das es von Sant Peter dem hailigen ApostellFůrsten gestifft werr.
Der Ertzbischoff von Coln. Sagt er wer eyn geordenter vnd warhafftiger
pfarrer zů Ach da die kron stat wer. Aber wie dem. So
wichen sie entlich bede des obbenanten Ertzbischoffen zů Meÿntz
haÿlickait. Vnnd gaben ÿm gewalt den erweltenn Romischen
konig. zů Romischen konig zů kronen vnd zů salbenn.

Darnach gieng benanter Ertzbischoff Hiltprecht von Meintz mit dem
Romischen kayser zů dem Altar. Nam das koniglich swert. Sambt
der koniglichen gůrteln. In sein hende. vnd kert sich gegen
dem Erwelten Romischen konig. Vnd Sprach also. Nÿm
gegenwertig koniglichs schwert. damit aůs Gotlicher vnd des gantzen
hailigen Romischen Raichs gewalt dir verlihen. alle Feyndt vnsers
herren Cristi. vnnd alle vncristliche Folcker vnd Nacion zůbestetůng
eynes ewigen frids der Cristglawbigenn zůůertreiben.