Aber wie früm. weÿs. klüg vnnd Gros dieser ErtzBischoff was. Dennoch wart
er verfúrt důrch bose Rethe. das er sich gegenn seinem Brůder dem
Romischen kaÿser. Otto. vmb sein grosse vnnd manchfeldige gúttat
vndanckbar erzaiget. Vnd ym vor vil gůts bos zůthůn fůrnam. Wann er
beschlos vnd meÿnet seinen brůder der Romischen koniglichen kron
zůberaůbenn. vnd dieselb des kaÿsers aÿdam seÿnem Swager Graůen
Hůgo von parÿs des kaÿsers stetem widerwertigen aůffzůsetzenn.
Derhalben er aůch ein kostliche kron mit vil perlen vnd edelsteÿn
gezirt lies machen. ym In dem selben namen zůschencken. In solchem
fúrnemen fordert dieser Ertbischoff Brůno benanten Grauen Hůgo
gen Coln ÿn zů konig in Lothringen zů kronen. Aber es wardt gewendt
důrch seinen Cantzler Volckmar. Wann da Graff Hůgo am hailigen
Ostertag nach beraÿtůng aller koniglichen zcirůng beÿ gedachtem
Ertzbischoff anregůng thet die kron zůerlangen . kam derr Ertzbischoff
wider zů ÿm selbst. vnd gieng aůs gotlicher erbarmůng in aÿn rew
seines fůrnemens. fordert sein Cantzler Volckmar fůr sich vnd entdeckt
ym sein wůnden. gar vleissig fragendt wie er daůon mocht gehailt werden