Daraůff Volckmar also antworthet. Mein gelibster herr der hailig
gaist hat dir eingeben das der bos feÿndt vnser selickait nit lenger stat
wider vnns mag habenn. Vnd meins bedůnckens wirt der bos feÿndt
geschent werden. vnd du beÿ eren bleÿben. důrch disen weg. Die kron die
dů deinem Swager hast zůgesagt aůff morgen zůgeben. wil ich wenn ir
beÿeinander werdet sitzenn antworten. damit allen menschen dein
glawb. trew vnd redlickait erscheÿn. Vnd wil gleich als vngern. vnd
mit vnwillenn vnd verdrÿs mit der kron fallen. vnd die also zůbrechen Aůff
das die brůderlich lieb itzt in dir kalt wider erwarme. Dieser
anschlag gefiel dem Ertzbischoff ser wol. Demnach er den almechtigen
Got vmb gnad anrúfft. Al s nůn der nachfolgendt tag kůmmen was. kam
der Cantzler mit der kron sich dermassen stellet als wolt er dem
ErtzBischoff die kron antworten. Aber als er schier zů ÿm kůmmen was.
fielh er vnd zebrach die kron. Daraúff der ErtzBischoff gros laÿd
vnd betrůbnÿs fůrgab. Aber Graff Hůgo. vnd die seinen ÿrer grossen
hoffnůng berawbet. hetten grossen schmertzen. Vnd zcog nach verlaůffůng
der hailigen Oster Feÿer mit vil andern geschencken. dann er verhofft hett
begabet wider heÿm. Wann der Romisch kaÿser vnd
der Ertzbischoff sich verainten. vnd in ewiger brůderlichen aÿntracht blÿben.

Dieser ErtzBischoff. Brüno. züColnn hat darnach gar ein
bůsfertigs vnnd hailigs lebenn an sich genůmmen Vnnd in grosser
Cristlicher andacht gelebt.