mit gewappenter handt in die kirchenn fieln. Stellet sich. Tancmarr. beÿ
den altar vnnd legt daraůff sein were vnd gůlden halsring. vnd
weil er ser hart. fern zů mit pfeiln vnd ander weÿs wart geletzt.
verwůndt yn Teodolff Graůenn Collo bastardt. Derhalben
Tancmarr. wiewol in solchen seinen letztenn notenn. doch seÿner
vorigenn ritterlichenn streitbarkait vnůorgessen. aůch wider verwůndt.
Vnnd sich auffs menlichst zů der gegenwere vnd
rettůng seins lebens stellet. Jnn welchem Ritterlichem
streiten Tancmarr. entlich hinterrůcklich zům fenster eÿn mit
eÿnem spies von einem Graůen gnant Meintzo erstochen wart.
Derhalben Tancmar beÿ dem Altar nidersanck vnnd starb.

Als dieser herr. Tancmarr. gestorbenn warr. ist er důrch bestellüng
seins brůdernn des Romischenn kaÿsers aůfs aller erlichst vnd loblichst
begraben vnd begangen worden. Vnd nach dem er kein Frawen gehabt. ist er an
leibserben verschiedenn.