Vngarnn beÿ Aůgspůrg. Inn welchem streit er aůch wol thet. zů
Regensbůrg gestorbenn. Vnd daselbst důrch geschefft.
seÿner Frawenn in vnser lieben Frawen Jůnckfraw Closter. begraben worden.

Dieser Hertzog. Hainrich. vonn Baÿrnn ist aůch der Haderhafftig
vnd der Bos genant wordenn. Villeicht darůmb das er sůnderlichen willenn
zů vnaÿnickait vnnd krieg gehabt hat. Derhalben billich
alle Fůrstenn vnnd Herren ein exempel von diesem Fůrstenn nemen. all ir
regiment vnd leben also zůfůrn das ir Fůrstlich ere vnnd
tůgent mit keÿnem vbell verclaÿnt můg werdenn. Dann alle
sůnde vnnd vbell soůil scheiniger vnnd offenbar seint. Wie
hocher stants die seint. So dieselbenn sůnd thůn. Vnd wie
Plůtarchůs der hochberůmbt lerer schreibt eben als die wartzenn
vnd annder gebrechen Im angesicht. scheiniger seint dann andere
gebrechenn am gantzenn leib. Also seindt aůch alweg
der herren vnnd mechtigenn sündt vnůerborgener dann der andern Dann
wie man findt in vil schrifftenn. So hat der hoch stanndt diese
art. das er nichts heimlichs vnnd verborgens lest bleÿbenn.
Sůndernn ÿe hocher vnnd trefflicher ein ÿeder ist. Ÿe mer vnnd
clarer all sein werck vnd red ann das licht brechenn.