Dieser Fůrst hat zů seiner eelichen gemaheln genümmen Frawenn.
Irmengard. gebornn vonn Landsberg. eÿnes Marggraůenn Im
Osterlandt zů Landsberg tochterr. Vnnd haben mit
eÿnander gehabt eÿn Sůn. Marggraff Eckbrecht zů Sachssenn
vnnd zwů tochter.

Mechtildt. die einem Marggraůen in welschen landen ist vertrawet
eelichen wordenn. Vnd. Gerdrůt. die dreÿ menner
gehabt hat. Erst Marggraůen. hainrichs. von Jlbůrg. darnach
Graůen Hainrichs von Northeÿm Hertzog Otto Sůn vnd Stiffter des
Closters Bůrsfelt. vnd entlich Graůen Ditterichs vonn kattelnbůrg.
der Sant Alexanders Closter zů Ennbeck. vnd das Closter zů kattelnbůrg.
gestifft hat. Vnd sie hat aúch mit Grauen hainrich von
Northeÿm ein tochter Rixza oder Rixa genant gehabt. die darnach Romische
kaÿserin geworden ist. kaÿser. Lothars. Graůen von Sůpplinberg vnd Arnsbůrg gemahel.