Solchs verschmeht dem Romischen kaÿser hoch. vnd zcog derhalben
mit eÿnem heer vor dieses Marggraůen Schlos Glichen. in
hoffnůng dasselbig. vnnd villeicht darnach aůch mer dem Marggraůen
abzůgewÿnnen Weÿl nůn dieser Marggraff fůr
billich ansach gewalt mit gewalt zůůertreibenn. gebot er
seiner Lanndschafft aůff. vnnd vberfiel den Romischen kaÿser
am hailigen Cristabent. Vnnd wiewol sich der kaÿser
zům ersten hart wereth. Doch bracht er ÿn vnnd sein Folck in die
flůcht. vnd erlegt vnd vberwandt sie. In welcher schlacht
aůch Bischoff Bůrckhart vonn Lasann tot bleÿb. der desselben tags das [lies: dem]
Romischen kaÿser das hailig speer vorgefůrt hett. Aůch wart
gefangen ErtzBischoff Liemar vonn Bremen. Vnd Bertoldt kaÿserlicherr
trůchsess. Vnd vil andere mer gefangenn vnnd erstochenn.