Benanter Romischer kaÿser. hainrich. der Vierd vngesettigt daran. das
er disen Edelnn vnnd streitbarn so vbell wie erzelt. hett lassen vmbbringen.
erzaigt er aůch seiner schwestern Frawen Gertrůdt. die zeit witwen.
vil vngnad vnnd beschwerůng. Nam ÿr aůch Braůnsweig Stat vnd
Schloss. Vnd legt aůff das Schloss seÿn Folck. Das den Sachssenn vil
verdrÿs vnd vbels beweÿset. Vnnd zuůor eÿnem Baderr der nicht fern
daůon wonet. Derhalbenn als die kaÿserische aÿn
mal In aÿner nacht schlieffen. Steckt benanter Bader das Schlos an.
Vnnd brant also zůsambt den kaÿserischen allen in grůndt. Darnach
machten die Sachssen ein verbůntnÿs mit herren Widekint vonn
Wolffenbuttell wider den Romischenn kaÿserr.