legt er eÿn tag gein Magdebůrg vnnd bescheÿdt vil Fůrsten dahin.
Demnach etlich Fůrstenn aůff seÿn ansÿnnen sich liessen vernemen. das
ÿn nicht zcimen wolt. so schlechts ÿn fůr ein Romischen konig zůerkennen
Sůndern baten vmb auffschůb. erlawbnÿs darzů vom Jůngen Romischen konig
dem sie beraÿt geschworn vnnd gehůlt hettenn. zůerlangen. Aůch
warn etliche Fůrsten die ÿm vnůerborgen anzaigten das all sein
fůrnemen vergebens seÿn wůrd.

Darnach hielt dieser Hertzog eÿn andern tag zů Qůidlingbůrg. da die
Fůrstenn hinkamen. die es mit ÿm hielten. Nemlich Hertzog Mesico
vonn Polnn. hertzog Boleslaw vonn Behem. Vnd Mistkowi ein
Wendischer hertzog. vnd anndere vil mer Welche diesem hertzog.
hainrich. als eÿnem Romischen konig hůldten vnd schworn gehorsam
zůlaisten. Er wart aůch von den seÿnen offentlich Romischer konig genent.