hineÿn zürückenn wart sein zükünfft den kongischen in der
Wagenbürg verküntschafft. Derhalbenn sie vor
Weÿmar aůffbrachenn. Vnd hertzog. Hainrich. vonn Baÿrnn am
Eÿtersberg vorhielt. des willens sich mit ÿm zůslagen. vnd keÿn
annder richtůng anzůnemen. bis er In gelobt ÿrn herrenn den
Romischen konig wieder zůhanden zůbringenn. Als nün hertzog
Hainrich ir gemůt vnnd antwort erfůr. das sie der meÿnůng.
wernn. ÿn vnnd all die seÿnen so e r beÿ ÿm hett zůerlegenn.
vnd zůerslagenn. er geredt ÿn dann Irn herren den Romischen konig
aůff ein ernente zeit widerzůbehendenn. gelobt er ÿn solchs zůthůn,
vnnd kam also zu seinem súnderlichenn glůck vnnd haÿl darúon.

Aůff ernenten tag bracht dieser hertzog Hainrich den Jüngen Romischenn
konig seÿn Vetternn wie er gelobt hett gen Rora. vnd stelt
denselbenn seÿner můtter vnd grosmůttern. Aůch den Fůrstenn
des hailigenn Romischenn Raichs so derhalben sich daselbst
versammelt hetten zůhannden. Mit was fraÿdenn aller Stende. hat
eÿn Itzlich Vernůnfftig mensch wol zůermessenn.