schwesternn Frawen Gerbůrg. Eptissÿn zů Gandersheÿm. Da
er nůn in kranckeit fiell. vnd nachdem er merckt. das er nach
Gotlichem willen sein vergencklich lebenn beschliessen solt. schickt er
nach seÿnem Sůn hertzog. hainrich. zů Baÿrn vnd entlich der hailig
Romisch kaÿser. hainrich. Sant Kůngůnd der hailigen Romischenn
kaÿserin eelich gemahell. Vnnd redt also mit ÿm. Lieber
Sůn. zewg eÿlends vnnd schnell in Baÿrnn. bestell das Landt. wie dů
kanst vnd waist. vnd seÿ deines Vaters eindechtig. Dann dů wirdest
mich in dieser welt hinfůr nicht mer sehenn. Seÿ aůch dem Romischen
konig deinem herren nicht vngehorsam. Wann vmb das sich mich in
vorzeiten wider ÿn mit vngehorsam gesetzt hab. reweth mich serr. Soůil
dir můglich ist So las die gotlich forcht aůs deinem hertzen vnd gemůt
nicht kůmmen. So wirt dich der Almechtig Got versehenn. Vnnd dich v nnd
all dein geschlecht hochlich wirdigen. Vnnd gesegent mit disenn
vnd andern Freůntlichen worten sein Sůn. Vnd kůrtz darnach als sein
Sůn in Baÿrnn reÿt. verschied dieser Fůrst eynes gar seligen Cristlichen
tots. am Achtvnndzweintzigsten tag Aůgůsti. Das ist an Sant Aůgůstins
tag. Vnd wart zů Gandershaÿm mitten Im kor vor des hailigen Creůtz
altar begrabenn.

Wiewol zü Regensbürg in Sant Emerams Closter ein grab ann derr
mawrn gegen mitternacht ist. mit eÿner Lateÿnischen grabschrifft.
dises Teůtzschenn einhalts.

Hertzog. hainrich. vonn Baÿrn des Romischen konigs Vater vnnd
eÿn schůtz vnnd schirm des rechtenn. ein gotsfortiger Herr leydt hie
begrabenn. Welchs villeicht also kůmmenn ist.
das sein leichnam důrch sein Sůn den hailigenn Romischen Kaÿser
hainrich. vonn Gandershaÿm dahin ist gebracht wordenn.