vnnd dem Stifft zů Meintz gegebenn. vonn wegen des grossen
vngehorsams seÿnes Sůns Hertzog. Lewtolfs. vonn Swabenn. vnd
seÿnes brůders hertzog. hainrichs. vonn Baÿrn. Vil in den Landenn
Důringen. Hessenn. vnd Wedraw ewiglich erbaÿgenn.

Aůff das aber dieser ErtzBischoff Wilhelm. vonn Meintz mocht
die Landt So ÿm sein Vater gegebenn hett behalten. versammelt er
ein grosse menig Edler vnnd freÿer lewth gein Dagoberstat. Schildenrode.
vnd Erfisfort. den er von ere wegen der Stat sůnderliche priůilegia
vnd freihait gab. Vnnd machet aůs dreÿen dorffernn ain Stat. die
er von eÿnem forth vber die Gera beÿ einer můln Erffa gnant.
Erfisfůrt nennet. Welchs man darnach vnd itzt Erffůrt nennet.
Derhalben von seiner zeit bisherr. das Bistůmb zů Meintz noch gerechtigkeit
in gnanten Landen hat. Also erwüchs dieser ErtzBischof von tag zů
tag ÿe mer vnd mer Inn tůgenden.