Nachdem sich Hertzog. Hainrich. vonn Sachssen dieses Romischen kaÿsers
bruder wieder sein Bruder mit pfaltzgraff. Eberhart. vnd etlichen
andern Fursten der meynůng verbůnden het. das er mocht Romisch
konig werden. wart der Romisch kaÿser aus dringender nottůrfft
bewegt seynes brůdern vnfreůntlichen můtwillen zůstewrn. Wolt
doch auff des anzcaigen das sein brůder derhalbenn In Lotringenn zu
Hertzog. Jselbrecht. von Lothringen seinem Ohaim gezcogenn werr.
nit glawben. Als er aber die warheit erfůr. zcog er seinem Brůder
nach. vnd belegt die Stat. Trotmůndt. die mit seinen Lewten besetzt
was. Derhalbenn die bůrger vor solcher grossenn gewalt erschracken
vnd den Romischen kaÿser einliessen vnd sich zů sambt yren soldnern
in gnad ergabenn. Auch bestrickt der Romisch kayser Herr Agina Hertzog
Hainrichs. Ritter der benante Stat Trotmůnde. Oder Trotmůnd In
seiner verwaltůng hett. mit einem scharffen aydt. zů seinem herrn in
Lo tringen zůreÿten. vnd soůil můglich wer. yn widerůmb vom krieg zům
Frid zůbewegen. Oder aber so er solchs nit mocht erlangen sich der Romischen
Koniglichen Maiestat wider zůstellen. Daraůff der Ritter zů seinem hern in Lotringen zcog.