Der Romisch kaÿser zcog mit heer an Reÿn vnd schicket seiner Graůen eÿnen
Adhalt seyner koniglich Maiestat Cammerer zů Hertzog. Iselbrecht.
vonn Lothringen. mit befelh. zůerfarn ab benanter hertzog Frid oder krieg
begert. Vnnd ab er des Romischen konigs freůndt oder feyndt wer.
Derhalben benante konigliche botschafft vnerlich entpfangen. vbel gehalten
Vnnd mit vnnůtzen worten. vontag zů tag verzcogen vnd aůffgehalten
wart. Entlich da der Graf des hertzogen von Lotringen arglistickait vnd
vbelmaynůng merckt. wolt er nit lenger mit worten gesettigt sein. Sůndern
gieng zům hertzogen vnd redt also. Das koniglich gebot thů ich
dir das du auff ernanten rechtstag vor koniglichen hoffgericht erscheinest
So dů aber solch gebot verachten wůrdest. soltů wissen das dů in der Romischen
koniglichen Maiestat acht getaÿlt vnd erkent wirst. Aůs welchen worten der
hertzog von Lothringen bewegt wart. dem Romischen konig bey dem Grafen zus
chreiben. Wiewol er so verborgen schreib das wohin sein gemůt genaigt wer.
nit mocht vernůmmen werden. Er lies aber nichts desterweniger die koniglich
botschafft erlich gelaitenn.