erwartet der Romische Kaÿser. Otto. der drit wider der gaistlickait.
nach des gemeÿnen Folcks erwelůng. als etlich schreibenn. Sůndern
machet diesen sein Vetternn zům Babst. Doch schreiben etliche
das er vonn der gaistlickait. vnd dem gemeÿnen Folck seÿ dem Romischen
kaÿser zů eren. vnnd vmb seiner tůgent willenn zům Babstůmb
erwelt wordenn Aber wie dem. So fÿndt mann. das er Jůng seÿ
Babst wordenn.

Wiewol aůch etlich schreibenn das der Romisch kaÿser. Otto.
der drit hab die Romische kaÿserliche kron vom Babst Joannes des
Namenn der Zwelfft. entpfangen. Doch findt mann in etlichen
glawbwirdigenn Cronicken. vnd beůor aůch in dieses Babsts
grabschrifft das er vonn diesem Babst Gregorio dem
Fünfften zů Romischen kaÿser gekront vnnd gesalbt seÿ.