gnedig zůbeweÿsen Vnnd nachdem er ein Haÿliger Vater. vnnd
Lobwirdiger herr was. wolt er seÿn gnad ewigenn. Derhalbenn
versammelt er ein hailigs Conciliüm. Vnd machet in demselben
mit verwilligůng des Romischenn kaÿsers. Otto. seÿnes Vetternn
vnd der Fůrstenn des hailigenn Romischen Raichs ein hailige
Constitůcien. Ordnůng. vnd aůssatzůng. das hinfůr in ewickait allein
die Teůtzschen soltenn recht vnnd gewalt habenn. ein Babst zůerwelen
Aůch hat er Inn benantem hailigen Concilio Sechs des hailigen Romischen
Raichs ChůrFůrstenn geordent vnd gesetzt. dreÿ gaistliche. vnnd
soůil weltliche. die hinfůr nach abgang des Romischen kaÿsers alweg
soltenn ein andern Romischenn konig erwelenn Der darnach
nach annemůng der Bebstlichenn salbůng vnd kaÿserlichenn kron. aůs
Bebstlicher hailickait handt solt Romischer kaÿser genant vnd gehalten
werdenn. Darůmb wůrdenn in derselben aůssatzůng
dise Chůrfůrsten des hailigenn Romischen Raichs verordent.
Von den Gaistlichen der ErtzBischoff zů Meintz ErtzCantzler důrch
Germanien. Der ErtzBischoff zů Trÿer ErtzCantzler důrch
Gallien Vnd der ErtzBischoff zů Colnn ErtzCantzler důrch Jtalien. Vnd
von den Weltlichenn der Pfaltzgraff am Reÿn ErtzTrůchsess Der
Hertzog zů Sachssen Ertzmarschalh. Vnd der Marggraf von
Brandenbůrg ErtzCamrerr. Hernachfolgendt ist beÿ
den zeitenn kaÿser. Friderichs. des andern aůch der konig von Behem
zů einem Cůrfůrstenn vnd Ertzschencken des hailigenn Romischen
Raichs gesetzt. als zů einem obmann. Aůff das. Wann die
Cůrfůrsten in erwelůng eines Romischenn konigs ÿrrig v nnd
zwitrechtig wernn. vnd dreÿ Cůrfůrsten aÿnen. vnd die andern dreÿ
Cůrfůrsten ein andern zú Romischen konig erweltenn. So solt derr
Romisch konig werden. der von den dreÿen Cůrfůrsten erwelt werr. den
der konig vonn Behem zůfielh. Etlich Schreibenn das
die Frantzosen sein ser vnwillig vber dise aůssatzůng gewesenn. vnnd
vermeindt das ÿn das Romisch Raich billicher dann den
… gebůrt. Weÿl aber des haÿligenn kaÿser Karls. geschlecht
sich in kaÿser. Lůdwig. kaÿsers Lothari Sůn geendt hett. můsten
sie sich enporůng ÿres vngrůntshalbenn enthalden. Wiewol aůch der
hailig kaÿser. Karll. die Frantzosen aůch der gebůrt nit angangenn
hat. Dann er ist der gebůrt ein Teůstzscher gewest. vnd Teůtzschen
landen geborn. als aůch Babst Piůs der ander schreibt. Vnd
Im Ersten Bůch dieser Cůrfůrstlichen Cronicken
berůrt. Nach dieser Bebstlichenn aůssatzůng ist erstlich wordenn.
der hailig kaÿser Hainrich. da man hat gezelt. nach Cristi gebůrt
Tawsent vnd zweÿ Jarr. Welche erwelůng Babst Silůester des Namen
der ander. bestett hat. Darůmb sein alle Teůtzsche Nacion nechst
dem Almechtigen nÿmants aůff erdenn So grosser loblicher woltat
mer schůldig zůdanckenn. dann dem Edelnn haws zů Sachssenn. … Daraůs