Vonn dieser hat er gebornn Vier Sůn.

Ottonem. den Drittenn nach ÿm Romischer kaÿserr

Hůgonem. Hertzog zů Sachssenn.

Friderich vnnd. vlrich. aüch hertzoge zů Sachssenn.

Aüch vier tochterr.

Adelheit. ader Ÿda Eptissin zů Qüidlingennbürg.

Sophia Eptissin zů Gandersheÿm.

Alasia. die hertzog zů Sachssen vnd dem erstenn Marggraüenn
zu Montferrer in welchsen [lies: welschen] landen ist eelich vertrawet. Aůs
welcher haÿrath vil herschafft vnd Edler geschlecht. erflossen
sein. Als nemlich die Marggraůen von Salůtz. von Botsch. von Penzoni. von
Seůe. von Mose. von Sanone, von Carret. von Imise. Vnnd von Sůse.

Die Viert tochterr dieses Romischen kaÿsers hat geheÿssenn. Mechtildt.
Welche ist Pfaltzgraůen Ezzo. oder Ezzelin am Reÿn verhaÿrath wordenn
Mit dem sie aůch dreÿ Sůn. vnd Sÿbenn tochter erlangt hatt.

Nemlich Hermann Ertzbischoff zů Colnn.

Otto. Hertzog zů Swabenn.

Lewtolff. der Jůng starb.

Mechtildt die Jůng ist gestorbenn.

Richesa. hertzog Mesico von Polnn gemahell.

Adelhait. ain Eptissin zů Niůella in der Stat in FranckRaich.

Theophania ein Eptissin zů Essendenn.

hedwig. ein Eptissin zů Neÿss am Reÿn da der hailig Ritter vnnd
merterer Sant Qůirin rastet.

Wÿlicka Oder als etlich haben Alathildt Eptissen zů Dÿdenkirchen.

Vnd. Ida. Eptissÿn zů Gandersheÿm.

Mann findt in etlichen Cronicken das dieser Romischer kaÿser. Otto.
hab noch ain eeliche gemahell gehabt eines hertzogen von Osterreich
tochter aůs Sannt Lewpolts geschlecht Von welcher er geborn hab. dreÿ Sůn.

Hügo. Friderich. vnnd Vlrich.

Hůgo ist ein Hertzog zů Sachssenn gewest.

Hat ein Sůn gehabt Bernolt. aůch hertzog zů Sachssen. Vnnd
hat regirt nach Cristi gebůrt Neůnhůndert vnd Im achtvndSibentzigsten Jarr.