Hertzog. Bernolt. hat gehabt ein Sůn Hůmbrecht gnant mit den blanckenn
henden. Welcher ein Graff ist wordenn
zů Morien in Sabandien. Von welchem die herren von Sopheÿ kůmmen sein.

Mit der anndern Frawenn hat der ander kaÿser. Otto. auch ein tochter
gehabt. Vtilhaÿdt. des dritten kaÿsers. Otto allein vom Vater schwester.

Diese ist Graff Ditterich vom holandt des namen der Viert
verhaÿrat wordenn.

Dieser Romischer kaÿser ist erstlich frech vnnd gar zcamlos gewest.
vnnd gab vil aůs an alle mas vnnd bescheÿdlickait. Vnd wolt sich
keines gůtenn vnd vernůfftigenn rats halten. Entlich wart er
derhalben gestrafft. vnd zům besten geweiset. Daůon er sich bekert.
vnd also loblich bessert. das er alle sein leben Lang tůgentlich
vnd hochrůmlich lebet. Vnd folget dem tůgentlichen rath. seiner
tůgentreichen vnnd hochwirdigenn můter. důrch welcher regiment vnd
herschůng er glůcklichen wolstandt. in allen seinen sachenn hett.