Nachdem aber das glück allenthalbenn vnd gemeiniglich gegen den
tůgentreichsten wandelmůtig ist. da der Romisch kaÿser. Otto. in
seinem widerzihenn důrch ain forth vber das wasser Axona in FranckRaich
mit seinem here vberfůr Nam er grossen schadenn. Wan der seinen
etliche ertrůncken. Etliche aůch von den feindenn. die ÿn nachfolgten
wůrden vmbgebracht Vonn welchem vnfall der Romisch kaÿser
so hoh beweget wart. das er ÿm gantz fůrnam sich an den Frantzosen
ernstlich zůrechenn. Vnnd het es anzweiůel gethan. Wann er nit von
dem sterben verhindert. wer worden. Damit sein here vonn vngewonlicher
grawsamer hitze beladenn wůrdt. Derhalben ser vil Folck dem kaÿser
kranck wardt in derselbenn raÿs. Aůch Graůe Braůn von
Arnsbůrg gar ein streitbar loblicher Ritter am letzten tag des Crist
monds. das ist an Sant Silůester tag. Starb mit vil andernn.