Dieser Romischer Kaÿser hat aüch dem Stifft zü Magdebürck
das gericht gegebenn zů sambt der gewalt das hinfůr nÿmer mer
nÿmants sol das gericht zů Magdebůrg wider in der Stat nach vor
Stat verwalten. Dann der vom ErtzBischoff daselbst darzů verordent wirt.

Dieser Romischer kaÿser hat aůch andere grosse gůter. Vnd Nemlich
Gebickosteÿn vnd das Saltzbůrg. so Sein Vater der Gros kaÿser. Otto.
reichlich dem Stifft zů Magdebůrg gegeben hat. bestetigt mit eÿnem
Lateinischenn brieff des vortewtzte maÿnůng hernachfolget.

Im Namenn der hailigenn vngetailtenn Drÿfaltickait. Otto.
aůs gůnst gotlicher gůte kaÿser merer. Wir glawben vnsers
Raichs vnnd kaÿserthůmbs gedeÿen sein. Wann wir die Stete dem
gotlichen dinst von vnsern vorfordernn beraithet důrch vnnser hůlff
vnd gewalt gehanthabt vnd beschůtzt werden. Derhalben
wir důrch bit vnnd erInnerůng mit andechtiger sorgfeltickait
vnser Frawen můter. Adelhait. vermant. Haben wir beschlossen
die hailig kirchenn zů Magdebůrg. die vnser allergůtigster Vaterr
vonn grůnt aůff erbawet. wider die eingriff vnnd belaÿdigůng
von allen enden ainfallendt. zůbeschůtzen Vnd haben bestelt
mit dem gebot vnser gewalt allenthalbenn zůschůtzen aůff das sie
In keÿn weg von ÿmants angefochten oder betrůbt werd. Demnach
wir das Lanndt gegen dem aůffgang der Sůnnen an der Sal gelegen.
Niletici genant. In welchem die Stete Gibichensteÿn. Dobrogora.
vnd Rodible sein mit ÿrem Saltzberg. vnd aller nůtzůng vnnd
zůgehorůng wie sie seligen gedechtnÿs vnser lieber Vater. von dem seinen.
dem hailigen merterer Maůricio zů recht vnd eÿgen mildiglich
gegeben hat. aůs nachfolgůng vnsers Vatern dasselb Lanndt zů selickait
seÿner selen der hailigenn kirchen zů Magdebůrg beÿ Ir ewig zůbleÿben
mit dem gebot vnser gewalt besteten. Aůch alles das vnnser Vater Inn
Framia [lies: Francia] Oder in Francken lanndt Nemlich vnter Meintz als das Closter
Hagonons zůsambt seinen Vorwercken vnd zůgehorůng. vnd ausserhalb
der Stat in der gegent Nagonni. Treÿsa. Gogonheÿm vnd hůffilesheÿm
vnd in der gegent vmb Speÿr Speÿrdorff. vnd in der Grafschafft Magin
Wesola vnd ketzelnheÿm mit aller seiner nůtzůng vnd zůgehorůng
vorbenanten allerhailigsten Mertrer Cristi Maůricio důrch sein
mildickait verlihen hat. Aůch vnser dúrchleůchtigkait důrch kaÿserlich
vnd gewalt beschliessenn ewig derselben kirchen zů Magdebůrg zůbleiben.
Aůch die gůter Guddesten. Pr edingen. Bernhardesrode. Ninpoldesdorff
Bischofstet.Rotstet. Biges. Gramanesdorff mit aller zů vnd eingehorůng
von dem selben vnsern Vater der hailigen kirchen zů Magdebůrg
lÿhen Aůch allen Zcehendt der sÿlber Zins von den Wendischen Landen