Constantinopell der Romisch kaÿser. Otto. wer mit dem Frantzosischenn
krieg So ser beladenn das er keÿn andern krieg darneben vermocht
zůfhůrn Derhalben Namen sie ÿn fůr alle Welsche
Landt in vorzeitenn zů dem Raich vonn Constantinopell gehorig
beÿ den zeiten des kaÿsers von Constantinopell Nicephori verlorn.
von dem Grossenn kaÿser. Otto. wie oben berůrt. erobbert
widerzůgewÿnnen vnnd einzůnemen Vnangesehen die
Swagerschafft damit sie aneinander verwandt warnn. vnnd Namen zů
sold aůff die Saracenen Oder haÿdenn die doůor von den Winden
vnd Venedigern aůs dem Raich Creta oder Candien vertriben warnn.
mit disenn Saracenen zogenn sie fůr die Stat Barům. Vnd als
sie dieselb Stat gewůnnen hetten damit die einwoner nit kůntenn
widerůmbfallen. liessen sie etliche erstechenn. vnd etlic he gein
Constantinopell in das elendt fůrnn. Also zcogenn die kriechen vnnd
Saracener fůr die Stat Machera in Calabrien gelegen. vnd verstortenn
dieselb Darnach ergaben sich die zweÿ Landt Calabria
vnnd Apůlien willicklich wider an den kaÿser vonn Constantinopel
Dadůrch ward der Romisch kaÿser. Otto. beweget. vnd zcog
mit sambt seiner gemahell der Romischen kaÿserin Frawen. Theophania. geborn
von Constantinopel mit einem ser wolgerůsten here Inn Jtalien.
Etlich schreibenn dieser Romischer kaÿser hab sich Sambt seiner
eelichen gemahel erhaben nach Jtalien. vnd seÿ kaůmet kůmmen gein
Tares da hab er erfarn wie vntrewlich sein Schweger die kaÿser
von Constantinopel sich gegen ÿm erzeigtenn. vnd was vnbillichen
kriegs sie wider ÿn hetten angefangenn. Die zweÿ Landt Apůlien vnd
Calabrien wider mit dem schwert zůgewÿnnen Darůmb schiffet
kaÿser. Otto. mit seinem here vber das Venedisch Mere. Vnnd
vberzcog die Winden vnd Dalmacien. zweÿ Landt die zei t dem
kaÿser von Constantinopel gehorsam. vnd fůrt ein grossen raůb
aůs denselben Landen. Teth aůch ein vbergrosse mannschlacht
vnnd rawb darÿnnen. vnd bezwang damit die kriechenn ÿr aÿgen
erblandt zůbeschůtzenn. vnd das ÿr zůbehůten. vnd sich frembderr
Landt zůenthalden. vnd aller vnbillichen eingriff zůmeÿdenn.