Als nůn der Romisch kaÿserr. Otto. aůs dem Landt zů Sachssenn
gezcogenn was. wůrden die wenden. Welche Cristen. vnnd dem
Romischen kaÿser vnterthenig warn worden. von wegenn der hoffart
Marggraff Ditterichs von Brandenbůrg so hoh beschweret. das sie
mit eÿmůtiger [lies: eÿnmůtiger] fůrnemůng zů der wehr griffen. den glaůben
verliessenn. vnd die zcins widersprachenn. das erfůrn die Cristenn
bald. Derhalbenn sich der ErtzBischoff Giseler vonn
Magdebůrg. Bischoff hildewart von halberstat Marggraf Dittrich.
die Graůen Rÿgdag. Odo. Biniz. Fridrich Dedo. vnd vil andere hernn
mer. die alle aůff ain Sambstag frůe mes horten. vnd darnach frolich
zům streit aůszogen. vnd die feÿnt die alle aůff ein Berck flohen
mit grosser manheit vermittels gotlicher hilff nidderlegten.
Wann sie wůrden alle erschlagenn. aůsgenůmmen wenig. Dann
etlich schreiben das der Wenden sein dreisig tawsent Sibenhůndert
vnd ViervndFůnffzcig erschlagen worden. d ie andern sich aůff einem Berg aůffhielten.
Aber die kaiserische von gotsgnaden bis aůf dreÿ alle gesůnt wider kamen.