Da nůn der Romisch kaÿser meÿnet er het. die feÿndt gentlich [lies: gentzlich]
vberwůnden vnnd erlegt. kamen vnůersehen newe vnd gerwte Ader
wider versammelte hawffen. vnd vberfieln die seinen. die do můde
warnn. vnd gewůnnen leÿder den Sÿg Wann die Romer
vnd die vonn Beneuent wolten nit streiten. vnd wichen můtwillicklich
aůs der Ordnůng. Darůmb fieln die
krÿechen die kaiserische die můde warn an. vnd erschlůgen sie
gar schier alle. Welchs an Sant Margrethen tag gescheenn ist
Es wůrden aůch in dem selben streÿt erslagenn Hertzog.
Reichart von Lothringen. der das Paner fůrt. vnd hertzog. Odo.
von Franckenn. mit neůn Graůen. Nemlich Graůen Tethmar
Bezzelin. Gebhardt. Gůnther. Ezelin mit einem brůderr
Bůrckardt. Dedo vnnd Cůnradt mit vil andern der Namen got weÿs.