vonn Swaben vorhin. Welcher mit der Romischen kaÿserin vnd
Bischoff Dittrichenn der beÿ ÿr was. Aůch vil kasten. als ab sie mit gelde
beladen wern. gegen dem mere [ergänze: fuhr] Als aber die krÿechen sahen die kaÿserin
mit also vil gaben. aůs der Stat kůmmen. wůrffen sie eÿn den ancker
vnd liessen Bischoff Ditterichen darein mit etwan wenig Teůtzschen
Důrch welches bit der kaÿser die geringe claÿder aůstet. Vnnd als er leichttere
vnnd bessere claÿder angezcogenn hett. vnd In dem fordern tail des schiffs
stůndt getrawet er seiner sterck. vnd der kůnst des schwÿmmens. vnd
sprůng schnelliglich in das meer. Als aber ainer aůs den krÿechen
Ÿn mit den klaÿdern zůhalden vermaint. wart er von dem loblichen Ritter
Lippo erstochen. Als diss die krÿechen sahen. flohen sie in das
hindertail des schiffs. Vnd der Bischoff kam mit den seinen in der
Barcken do e r mit zůgefarnn was. vngeletzt zů dem Romischen kaÿser.
an das gestat. Do er von den gegenwertigenn vnnd nachkommenden
mit grossenn freůden entpfangen wart. Aber die krÿechenn
erschracken des ser. vnd zcogen gar trawrick wider heÿm. Vnd
die sůst alle nacion vnd lantschafft pflegten zůbetrigen. entfůnden
sich domals von andern betrogen. vnd mit frembden listen vberwůnden.
Etlich schreiben das der Romisch kaÿser. Otto. der ander seÿ nach dieser
schlacht aůff das meer kůmmen. vnd die schifflewt gebethen ÿn In ein
schiff zůnemen. Vnd hab sich fůr eÿn kaÿserlichenn diener aůsgebenn.
Aber er seÿ fůr den Romischen kaÿser angesehen vnd geachtet worden.
Welche soůil redt vntereÿnander gehabt. das er vermerckt hat das
sie ÿn woltenn dem kaÿser vonn Constantinopel bringen. Als nůn
dis der Romisch kayser vernůmmen hab. seÿ er ser erschrockenn.
vnd in demselben den schifflewten gesagt wie er ein grossen schatz
in Sicilien hab. bittend sie wol ten denselben holen. vnnd darnach
mit ym verfarn Daraůff haben die schifflewt zů Lanndt
getracht. Also hab der Romisch kaÿser ein frůmmen Bischoff ersehen.
den er vmb hůlff vnnd rettůng angerůfft. Vnd hab důrch vorbit
vnd anrůffůng Sant Peters mit sambt gedachtem Bischoff die schiff
lewt alle. der einvndviertzig gewesenn sein erslagen vnd vmbgebracht.

Etliche meÿnen das die kriechen darůmb haben abgelassenn das sie
die zůkůnfftige rach besorgt habenn. Vnd das des Romisch Raich
solchen grawsamen schaden vngestrafft in kaÿn weg wůrd leÿden.
Sůndern sich bevlissenn vilfaltiglich hoher zůrechen. Welchs
gescheen ist Nach Cristi gebůrt Neůnhůndert vnnd Im
zweÿvnndachtzigstenn Jharr.