kaÿser deshalbenn gehabt. Vnnd als er die Botschafft gehort hab seÿ
er mit grosser neÿgůng willig gewest den Fůrsten damit gnedigenn
willenn zůerzcaigenn Beůor dieweil die Romer in grosser mÿshellůng
warnn. Vnnd der Romisch kaÿser in grosser vnd schwerer
ferlickait aůch stets seins lebenns stůndt.

Darůmb legt der Romisch kaÿser ein Reichstag gein Bernn In Welsch
Lant Nach cristi gebůrt Neůnhůndert vnd darnach Im dreÿvnndachtzigsten
Iar Daselbsthin wůrden gefordert alle Fůrsten des Raichs. Die
aůch also dahin kamen. Allein hertzog Benno von Sachssen aůff
mitteln weg wider vmbkert. Darůmb das seinerr
Stete aine die der kaÿser mit gebew vnnd lewthen bevestet hett. wider
die Denen. von den Dhenen mit betrigereÿ gewůnnen vnd erobbert
was. vnnd nach ertotůng des hinderhalts verbrant. Aůff
demselben tag warden vil trefflicher notiger hendel vnd sache
aůsgericht. Wann dem Romischen kaÿser wart eÿn new heer zůerkant.
Hertzog. hainrich. von Baÿrn wart aůs dem elendt gefordert. vnd wider
zů einem hertzogen in Baÿrn gesetzt. Aůch wart des kaÿsers Sůn. Otto.
der dritt zů aÿnem Romischenn konig erwelt.