Darnach bracht der Romisch kaÿser ein mechtig here zůsammen. vnd
zcog mit dem selbenn newen here wider gein Rom. vnd macht ein grosse
wirtschafft vor den Greden Sancti Petri. als er wirdiglich entpfangen
was. alle vnainickait vnd zwÿtracht daselbst schwebent hinzůlegen vnnd
bat zů solchem essenn alle die trefflichste fůrnemste vnd edelste
der Stat Rom. Vnd als er nůn sie zůsetzenn geschafft hette.
vnd sie aůffs frolichst assenn vnnd trůncken. lies er sie
vmbgeben mit Wepnernn Vnd lies do lesenn alle Fridbrecher vnd
vngehorsamen. Die er So balt enthewpten lies. Vnd hies die andern
frolichen essen. Welchen er gnad erzaigt. vnd ÿr vergreiffůng vergab.
Etlich schreibenn der Romisch kaÿser hab wol vorgehabt der Romer
vntrew zůstraffen. hab aber aůs besorgůng merer enporůng sich
des nicht zůvntersteenn enthaldenn.