Dieser Romischer kaÿser ist den Venedigern ein zeit vngnedig gewest. vnnd als
man aůch in den Venedischen Cronicken befindt. hat sichs also
begebenn. Die Venediger hetten die zeit ein Hertzog in der anzal
der dreÿvnndzweintzigst genant Peter Candian wider denselbenn
erhůb sich die Stat zů Venedig vmb seÿnes wůterlichen regiments
willenn. Vnnd růckt mit gewalt vor den Palast. Als er
sich nůn vermeint entpor zůrettenn. steckt das Folck das Palast
an Daůon nicht allein des hertzogen Palast. Sůndern aůch Sant Marx
kirchen angieng Als nun benanter Hertzog vonn Venedig sah das
er allenthalbenn mit vnglůck vmbgebenn was. vnd entwer weÿchen oder
sterbenn můst. Nam er sein Jůngenn Sůn. an seÿn arm. vnd gieng
mit ÿm an das ort in Sannt Marx kirchenn das noch nicht vom fewr
begriffenn war. Verhoffendt důrch eÿn heimlichen weg. mit sambt
seinem Jůngen Sůn mit dem leben In das elendt zůkůmmen. Da er aber
sah das alle locher belegt warn von den wepnern bat
er mit grossem vleis. das sie ÿn nicht wolten als eÿn wÿld thier
vmbgeben. Sůndern sich die handt an ÿn zůlegen So lang enthalden
bis er sich gegenn dem Folck entschůldigt. So hett dennoch
das Folck gelegenhaÿt ÿn zů toten. oder beÿ dem leben zůlassen. Es
mocht aůch wol sein das das gemeÿn Folck redlich vrsach zů ÿm hett.