Vnnd er zcog gein Rom. Da er schwerlich kranck wart. vnd des
hailigenn Apostel Bartholomei haÿlthůmb in die Innsel Joůis oder
Lÿcaoniam itzt Sannt Bartholomes Insel genant. verordent.
Da er nůn mercket das endt seines lebens nahend seÿ. taÿlet er alle
sein geldt in Viehr taÿl. Das Erst taÿl bescheÿd er der kirchenn.
Das annder den armen. Das drit seiner Swester Mathÿlden Eptÿssin
zů Qůidlingenbůrg. Vnd das vierdt seinen armen dienern vnnd
Ritterschafft. Teth darnach sein beicht lateinisch der Bebstlichenn
hailickait. vnd den Bischoůen. vnd entpfieng aůch vom Babst entbindůng
seiner sůnde. vnnd das hochwirdigst Sacrament. Vnd starb also loblich
am Sibenden tag des Cristmonds. Nach cristi gebůrt Neůnhůndert vnd
Im Viervndachtzigsten Jhar. vnd dreÿvnddreÿssig Ihar darnach also
sein Vater sein můter genůmmenn hett. Vnd ist zů Rom Inn Sant
peters můnster in dem eingang des paradis gegen dem aůffgang der sůnnen
in eÿnem roten marmern steÿnen grab aůffs aller wirdigst begraben
worden Es schreiben aůch etlich das diser kaÿser seÿ in eÿnem streÿt mit
einem vergifften Pfeÿl geschossenn. vnd daůon gestorbenn.

Kaÿser. Otto. der annder ist Lateinisch mit dreÿen zůnamen
genant wordenn Nemlich Růbens das ist Rot.
Sangůinariůs das ist Blůtrot. Vnnd pallida mors das ist
der blaich toth. Wiewol der letzt zůnamen. den ersten zweÿen entgegen ist.