Nachdem nůn dieser Romischer kaÿser von seinem Vater Dem
Romischenn kaÿser. Otto. des Namen der ander. vnd von den Fůrsten
des hailigen Romischen Raichs aůff dem Reichstag zů Bern zů Romischen
erwelt was. wart er baldt. wiewol ein vnmůndig vnd dreyIherig
kindt. von den Fůrstenn vnd sůnderlich von den fůrnemsten Bischoůen
gen Ach gefůrt. Da ÿn herr Johans von Rabenna vnd herr Willigs zů
Meintz ErtzBischoffe am hailigen Cristag Nach Cristi gebůrt
Neůnhůndert vnd Im Viervnndachtzigstenn Jhar. zů Romischenn konig
salbten. Welchem aůch gedachte ErtzBischoůe mit sambt vil
andern Fůrsten vnnd herren hůldten. Aber ee die weihůng dieses
Romischen konigs wart recht verbracht. kam Botschafft mit betrůbter
anzaigůng der kaÿser. Otto. der ander gestorben wer. Doůon die Fůrsten.
Herren. vnd vil andere hoch erschracken. Wann kaÿser. Otto. der ander
het nach seines Vaters tot. das hailig Romisch Raich vnd kaÿserthůmb getrewlich
regirt. vnd was ein starcker hanthaber vnd beschůtzer seiner Lande.
vnd wart geforcht von allen feinden des Raichs.