Darnach vnnterstůndt sich Hertzog. Hainrich. vonn Baÿrn dises
Romischen kaÿsers Vetter. Romischer konig zůwerdenn vnnd sein vettern
wiewol beraÿt zů Romischen konig zů Ach gekront. vmb das Romisch
Raich zůbringen. Vnd nach dem er vermeint der nechst vormůndt des
Iungen Romischen konigs sein. nam er ÿn vom ErtzBischoff warin
zu Coln in sein hende. Derhalben etlich Fůrsten demselben hertzogenn.
Hainrich. zů Baÿrn zůfieln Darůmb etlich Cronicka haben das diser
Romischer kaÿser hab vil widerstants vmb das Romisch Raich gehabt. Etlich
schreiben also. da der Romisch kaÿser. Otto. der ander gestorben
seÿ. haben etlich Fůrsten Sein Sůn den dritten kaÿser. Otto. etlich hertzog.
Hainrich. von Baÿrn. Aůch etlich in welschen landen Crescenciůs vonn
Noment zů Romischen konig erwelet. Aber weÿl die Obersten hawplewth.
des Romischen kaÿsers. Otto. des andern die zeit zů Rom gewesen. haben
sie an allen verzcůg disen dritten. Otto. zu Romischen konig erwelt
Welche wal. zwÿtracht abzůlaÿnen vom Babst Benedictůs dem Sibenden seÿ
bestetigt wordenn.