Jnn mitler zeit bracht der Hertzog vonn Baÿrn alle Baÿrische
Bischoůenn vnnd Graůen an sich. vnd zcog mit ÿn Inn das Landt
zů Francken vnd leget sich beÿ Bussenstet aůff die Weÿde mit den
Fůrstenn des Landes zůreden. Daselbst hin kamen der ErtzBischoff
Willigis von Meintz. hertzog. Cůnradt. von Franckenn
vnnd andere Fůrsten vnnd herren. Vnd als er vergebens sich
bevlÿss dieselbenn Fůrsten an sich zůbringenn. Wart
er vonn ÿn bezwůngenn. von wegen des kůnfftigenn kampffs
das er schweren můst aůff den Dreÿssigstenn tag des Monats
Jůlÿ Oder des hewmonds gein Rora zůkůmmen. vnnd den
Iůngenn Romischen konig seiner můter vnd ÿn widerzůgeben
Vnnd zcog also ein Ÿtzlicher wider heÿm.