Da der Romisch Kaÿser erfůr das sein Brůder Hertzog. Hainrich.
zů Mersbůrck einkůmmen was. eÿlt er ÿm nach. Legt Sich vor
Mersbůrck. Vnnd als er zwen Monath vor Mersbůrg gelegen was.
gieng hertzog. hainrich. aus der Stat. vnd gab sich in gnad. Also
nam der Romisch kayser Mersbůrg eyn. Da nůn Hertzog.
hainrich. Frid vnnd frist was gebenn. mit sambt seiner Ritterschafft
Inwendig dreisig tagen aůs Důringen vnd Sachssen zůziehen Doch
das die Ihenige die sich zům Romischen kaÿser wolten halten. in
gnad solten genůmmen werden. Da rÿet Hertzog. Hainrich. nach
ausgang benants anstants wieder In Lothringen Vnd blÿb beÿ
seinem aÿdam dem Hertzog. zů Lothringen So lang er mocht vnd kůnt.