Mesick vonn Poln hett in dieses Romischen kaÿsers gnad gegeben
vnnd kriegtenn stets derhalben mit ÿm. Darůmb der
Romisch kaÿser bewegt wardt. mit den Wendenn vnnd
Behemen zůkriegenn. Die er aůch mit manchfeltigem Sÿg in vil
schlachtenn vberwant. vnd hahin [lies: dahin] bracht das sie sich aůch in gnad gaben.

Nach Cristi gebürt Neůnhůndert vnnd Im Fůnffvndneůntzigsten
Jhar versammelten die Seerewber ein vbergros here. Vnnd teten den
Sachssenn vil schadens Aůch begab sich in oberlanden grosser hůnger
vnnd sterben. Derhalben zcog dieser Romischer kaÿser. Otto.
die zeit nach Romischer konig vber die Obotriten vnd Lawsatzer die
seinen zůrechenn. Darůmb das benante Folcker den Seerewbernn
hůlffen vnnd beÿstendig warnn. Also verhert
er Ÿn ÿr Lanndt gar mit kriegenn.