Jn mitler zeit gab Ritter kitzo dem Romischen konig die Stat Brandenbůrg
wider ein. Wann da Marggraff Ditterich von Brandenbůrg
ÿm etwann vnfreůntlich hett mitgefarn. gab er sich zů den Wendenn.
Welche als sie ÿn getrew in allenn sachen befůnden. Gabenn sie ÿm
Brandenbůrg ein. die Sachssenn daraůs zůbeschedigen. Aber gedachter
Ritter gab sich entlich mit sambt Brandenbůrg dem Romischen konig.
Derhalben die Lawsatzer mit grossem zcornn beweget. ÿn belegten. Als
nůn dise mere kaÿser. Otto. die zeit zů Magdebůrg ligendt erfůrr.
schicket er Pfaltzgraff Friderich. Marggraff Eckhart. vnnd die
Graůen die er beÿ ÿm hett fůr Brandenbůrg. Welche. als sie sich
vbell vorsahen vnd versorgten. wůrdenn sie von den feinden vberfallen.
Aber wie dem. So kam dennoch ain tail der kaÿserischen vnd nemlich der
Sachssen in die Stat Brandenbůrg kamen. Aůch wůrden
dem Romischenn kaÿser vil gůter lewth erslagen. Dis