Die zeit bracht dieser Romischer kaÿser. Otto. die vonn Capůa
vnnd die vonn Beneůent. als vngehorsame des hailigen Romischen
Raichs. wider in gehorsam vnd vnnterthenickait desselben mit
gewalt. vnd mit einem grossen here. Welchs dem kaÿser vonn
Constantinopell genant Michael Cathalanůs misfiel. vnnd zů
vnwillen raicht. Dann er wolt dieselben zwů Stete
Capůa vnnd Beneůent mit ÿren ein vnnd zůgehorůngen in seinem
versprůch vnnd schůtz habenn. Derhalben er sein botschafft
zů dem Romischen kaÿser. Otto. schicket. mit beůelh. ym von seinet
wegen zůsagenn. das er wolt eindechtig sein. ÿrer Swagerschafft
vnd mogeschafft. aůch des Veterlichenn verbůndnÿs das zwischen
seinem vater vnnd ÿm aůffgericht were. vnd wolt sich derhalb
enthalden die Lanndt dem kaÿserthůmb zů Constantinopel zůgehorig
zůůerherenn vnnd zůůerterben. Dann wo solchs von ÿm also nit geschee.