Inn dem kam der Romisch kaÿser vor Rom mit seinem here. vnnd als er
sich darfůr gelagert hett. hůb er an die Stat zů stůrmenn mit
solchem ernst das die Romer merckten. das all ir sterck vnd
befestůng wider den Romischen kaÿser vngnůgsam wer. Darůmb
batenn sie vmb gnad. vnnd offenten dem Romischen kaÿser nach
erlangůng kaÿserlicher gnad. die thor der Stat. Also zcog
der Romisch kaÿser zů Rom ein. vnd kůrtz daůor ee der Romisch kaÿser
von den Romernn wart eingelassenn. flogen der vermeint Babst
vnnd Crescenciůs aůff die Engelsbůrg Sich daraůff zůenthaldenn.
Dorvon aůch die Engelsbůrg ein zeit des Crescencÿ Bůrg ist
genant wordenn.