Da nůn der Romisch kaÿser wolt vnnd můst wider in Teůtzsch
Lanndt zciehenn befal er Welsche Landt zů regirn eÿnem gar
Erbarn mann Hůgo genant den er zů Landtvogt in gantzen Jtalien
vnnd Gůbernator in Ethrůrien setzet. Der in allen sachen aůfs
best vnnd loblichst regirt vnnd handelt. Vnd nachdem er
entlich zů Pistoriům gestorben was. wart er von dem gantzen
Lanndt Ethrůrien gleich als eÿn Vater claget. Daraůs diesem
Romischenn kaÿser ein gros lob erwůchs. Vnd billich alle Fůrsten
ein exempel nemen sollen. Solchen lewten Ambt vnnd Lannt
zůbefelnn. der mer liebt ere. vnnd den gemeÿn nůtz. dann aÿgen
genÿess.