Darnach stifftet dieser Romischer kaÿser ein ErtzBistůmb
zů Gnesna in Poln vnnd befal es Radÿno des gnanten Bischoffs
brůder. vnnd vnnterwarff ÿm den Bischoff von Salsecholberg, von
Cracaw. vnd von Presla. Freÿet den Bischoff von Pesna. macht einenn
altar. vnnd lies darein schliessenn das hochwirdig haÿlthůmb
Sant Adalbrechts. Vnnd als er alle sachenn hett wol aůsgericht.
wart er vonn gnantem hertzogen mit grossen gaben. Vnd
mit dreÿhůndert wolgerůsten edellewtenn begabet. Welchs
vber alles annders dem kaÿser liebt vnnd gefiel. Derselb hertzog
zcog aůch mit dem Romischenn kaÿser bis gein Magdebůrg
Da sie den hailigen Palmtag hielten. Vnnd als etlich
schreibenn ist es gescheen nach cristi gebůrt Im Tawsenten Jharr.