bůchern wenig vermeldůng ist. Villeicht der Romischen kaiserlichen
Maiestat zů eren. vnnd von wegen. der graůsamen vntat. der kaÿserin
Dennoch hat Gotfridůs von viterb. vnd sůst noch ainer solchs beschriben
Welchs aůch vmb bewůnderůng willen. hernachfolgt. Vnnd sal
also ergangen sein. Diese kaÿserin hett ÿr vnkeůsch
awgen vnnd gemůt aůff ein Graůen von Amůla geworffenn.
Darůmb das diser Graff vonn allen menschen wart als der aller
schonste vnnd aller Frůmste ainer gerůmbt vnter den hoffdinern.
Welchenn aůch kaÿser. Otto. in reten in welschenn Landen gar
vernůfftig vnnd klůg erfarn vnd befúnden hett. Daůon ÿn die
kaÿserin erkennet. Weil nůn die leiplich schon
zů mermaln gros nachtaÿl vnnd schandt der eren pflegt zůgebern.
gieng die kaÿserin in ain haimliche Camm er. vnd gab grossen
schmertzen trawren vnd leÿden fůr. Vnd schicket ÿren
haimlichstenn diener ainen zů dem Graůen von Amůla beÿ der Stat
Mutina wonhafftig. gebietendt aůffs allerschleůnigst zů ÿr zůkummen.
Welcher sich als eÿn getrewer dinstwilliger vnnd gar gehorsamer
diener des Romischenn kaÿsers erhůb. Vnnd mit der Romischen kaÿserin
diener zů ÿr zcog. mit grosser bewůnderůng was solche eÿlůng
bedeůt. vnd kam zůstůndt fůr die kaiserÿn Vnnd da er ÿr als der
Romischen kaÿserin ÿr gebůrent ere erzcaigt. hett. fragt
er vmb die vrsach ÿres grossenn trawrens. Welchem die
kaÿserin dise antwort gab Die ganntz vrsach vnd alles
anhebenn meÿnes anligens vnnd schmertzens bistů. Derhalbenn
kanstů aůch meÿn aÿnigs hail vnnd artzneÿ sein. So dů itzůndt
wirst in meÿn gemůt verwilligen. vnnd dich meins willens erzaigen.
Wann dise deine glantz scheinende awgenn důrchdringen mein
hertze. vnnd erwegen ain vbergrossen brant Inn mir. Der Frům
tůgentreich Graff erschrack vonn disem vnůersehenn vbel. vnd
saget er wer dem kaÿser getrew vnd holt zůsein geschworn. vnd wie.
das er aůch důrch forcht des Gotlichen vnnd menschlichenn gesetz
schewt solch vbel zůvben. Darůmb wolt er nÿmmer mer sein
lebetag dem kaÿserr glawbenn brechen vnd vntrew werden. Welcher
anntwort die kaÿserin also erschrack. das sie Inn ammacht fiell.
Sprechendt. Erbarm dich vber mich die ich vonn deinet wegen verdirb.
Dich sal aůch nit bewegen vnnd abschreckenn der aÿdt So dů dem
kaÿser gethan hast. dem dů důrch dein verwilligůng vnnd wilfarůng
wirdest kůmmen mich beÿ leben vnterhaltenn. die ich sůst werd sterben.
Wann dů hast itzůndt můs vnnd fůg mein willen dÿweil wirr
allein sein zůůerbringen. Dann was nÿmants waÿs das ist dermassen
als wer es nit gescheen. Daraůff der Graff hies die kaÿserin Ÿrr