verhor vnnd erkentnÿs zů der richtstat vngestÿmmiglichen gefůrt. Inn
dem begegent ÿm sein eelich weib. Also bat er die Stat knecht vnnd Bůttel
vmb lawb vnnd zeit mit der kaÿserin zůredenn. Vnd da sie ÿm erlaůbtenn
redt er also vor allen menschen offentlichen. Mein liebe schwester
sich an ain solch lon wirt mir vmb mein getrewe dinst gegeben. Darůmb
mein liebe Swester bit ich dich důrch dein Eelich lieb vnůerrůcklich
gegenn mir erzaigt. (. Wann ich hab nit vil zeit mit dir zůreden .)
Da dů wellest vnerschrockenn nach meÿnem todt. die vntat der ich
beschůldigt vnd verclagt werd. mit eÿnem glůenden eÿsen rechtfertigen.
Dann dů waist ÿe aigentlich. das ich wider die kaiserliche Maiestat nit
gehandelt hab. vnnd das ich vnschůldiglichenn zů solchem schmeelichenn
tot gefůrt werd. Also wart derr Edell Graf zům tot gefůrt,
mit grossem weÿnen se iner Frawenn. Vnnd wiewol er solt itzt sterben
dennoch vmb bedenckůng willenn seiner vorigen manlichen streitbarkeit.
wolt er der kaÿserin vntat nit entdecken. Aber sein blůt mit milch
fliessendt gab anzaigůng das er vnschůldiglichenn getotet wart.

Darnach erhůb sich ein gemeÿn geschreÿ. wie das der kayser vil zůschnell.