Erzelter wůndersamenn seltzamen geschicht. verwůndertenn sich
alle menschen vber alle massenn. Vnd ainer sah den anndern
an. Derhalbenn der kaÿser vor allermeniglichenn bekant. das er
vnwissent an dem Graůenn gesůndet hett. Angesehen das er schůldig
werr nÿmants mer zůglawbenn. dann seiner Frawen. Darůmb
bat er vmb aůfschůb seines vrtails erst vonn ÿm vber den vrsacher
des Graůenn tots gefellet. Vnnd schicket nach seÿner Frawen der
kaÿserin. Als die kaiserin fůr gericht kůmmen was. Lies er ÿr
anzaigenn. das bescheenn wůnderzaichenn. Daraůff sie aůch
wart hoch vermant die warheit zůsagen. ab sie den frůmmen Graůen billich
ader vnbillich verclagt hett. Vnnd solchs zů ere dem almechtigen.
Got meldenn. Daraůff die kaiserin mit grosser forcht wart
vmbgeben. Aůch mit pleicher farb. vnnd aůff ÿr knÿe vor dem kaÿser
niderfiel. vnnd bestůmmet also. das sie kein wort redenn kůnt.