gebůrt ein Frantzos. Vnnd erstlich ein Můnch zů Floriack vor dem
Babstůmb genant Gÿlbert oder Gerbrecht Darnach
ist er aůs dem Closter gelaůffenn. Vnd ein Swartzkůnster worden. vnnd hat
sich dem bosenn feindt als etlich schreibenn ergebenn. Vnnd ist
ser gelart wordenn. Vnd hat dadůrch. vnd zům taÿl důrch fůrderůng
dises Romischenn kaÿsers. zům Erstenn das ErtzBisthůmb zů Rom.
darnach das ErtzBistůmb zů Raůnen. vnnd entlich das Babstůmb
erlangt. Weil er nůn gern lang in so grosser ere
gesessenn wer. fragt er ein mal den Tewfell wie lang er lebenn
wůrd. Antwort der Tewfell. Weÿl dů nit gein hierůsalem kůmst.
Als nůn der Babst Im Fůnfftenn Iar seines Babstůmbs in die kirchen zům
hailigenn Crewtz gezcogen was. mes zů haldenn. hielt er mes an dem
ort. derselbenn kirchenn. Welcher HJerůsalem genant wirt.
Vnnd vnter dem Ambt der hailigenn mes. fiel ÿm ein des Tewfels
anntwort. vnd das sein tot nahend were. Derhalben er
aůff berewůng begangner sůndt. bekant vnnd beÿcht sein sůndt
offentlich vor allem Folck. vnd vermant es zů der gotlichen forcht.
vnnd Got trewlich zůdinen. Vnd bat das Folck sein Leichnam
wie er verdÿnt hett. stůckweÿs zůhawen. vnd aůff ein karrenn
legen. vnd darnach am den endt zůbegraben. da es die pferde vonn
ÿn selbst hinfůrten. Also fůrten die zweÿ pferd So fůrgespant.
wůrden. den zůhawen Corper Inn Sant Ioannes Lateran kirchen.
Da er aůch entlich begraben ist worden. zů einem sůnderlichen trost
allenn sůndern. Das Got keÿnem menschen weÿl er lebt seÿn
gotlich gnad eÿner warhafftenn bůs wil versagenn. Etlich
Cronicka habenn das der dritt kaÿserr. Otto. Sambt etlichenn
andern Fůrstenn aůch etwas vonn benantem Babst in der Swartzen kůnst
gelernt hab. Es Schreibenn etliche. das.
So offt ein Babst woll sterbe. Dieses Bebants [lies: benants] Babsts grab schwitze.
Vnd das die gebeÿn In demselbenn grab werdenn gehort. gleich
als gegeneinander geslagen clappernn.