Weÿl nůn dieser Babst sich eÿn mal in die allerhochste ferlickeit
begebenn hett. wolt er nicht vnderlassenn sein vngezempt begirr
zůerfůllenn. vnd nachdem die zeit beÿ Rom aůff dem platz genant
Campůs Marciůs ein eren leÿb zaichenn stůndt das den zceigerr an
der rechten handt von sich streckt. vnd aůff dem hewbt dise schrifft
hett. hic perůtte. das ist. hie schlag. wart dasselbig vonn vil lewten
also verstanden. als wer ein schatz doselbst begrabenn. Derhalben
sie dasselbig bild. mit beÿeln hetten aůffgehawen. Demnach aůch
dieser Babst ein mal an den ortt da der schatten des benanten fingers
am bildt Inn der sůnnen Im mittag hinreicht. eÿn pfall steckt.
vnd als es nacht war worden. gieng der Babst nit stercker. dann
mit seinem Camrerr. mit eyner latern an berůrte malstat. Da er
důrch sein zawbereÿ zůwegen bracht. das sich das ertrich daselbst
weÿt offent. Als nůn der Babst also zů sambt seÿnem Camrerr
hinein ků mmen was. sahen sie ein koniglichen sal. gůlden wende.