weniger růchtbarr werdenn. erdacht der Hertzog vonn Venedig dise
maÿnůng. zů mittag as er offentlich. vnnd des abents mit dem
Romischenn kaÿser. vnd nachdem dieselbenn tag dem Hertzogen vonn
Venedig wart ein tochter gebornn. wart sie vonn disem Romischen kaÿser. aůs
der hailigenn taúff gehabenn. Aůch erlies diser Romischer kaÿser
den Venedigernn das gůldenn tůch das sie Iherlich můsten dem Romischen
kaÿser vonn eÿner richtůng wegenn. geben. Vnnd diser
Romischer kaÿser hat aůch den Venedigern den hanndel vnd die Niderlag
gegebenn. vnd etlich gůter mit dem schwert erlangt. bestetigt.

Da der kaÿser alle sachenn in Teůtzschen Landen wol geordent hett.
zcog er in Jtalienn gein Rom. Da er vonn der Bebstlichenn
hailickait vnnd von den Bischoůenn mit grossen eren entpfangen
vnd angenúmmen wart. Vnd nachdem er die Stat Rom in bosen gewonhaiten
befandt. vnnd in vil mÿsbraůchůng der siten. thet er vil. vnd nam
manicherleÿ fůr das ÿm etliche woll. etliche vbell aůslegtenn.