Derhalbenn die Romer bewegt wůrden. zů grosser grÿmmickait. dann
sie hasstenn ÿn vormals vonn wegen der aůssatzůng mit den Cůrfůrsten
des Romischen Raichs. vnnd das. das hailig Romisch Raich solt beÿ den
Teůtzschen sein. Darůmb vnterstůndenn sich die Romer důrch ainen
Patritenn vnd Edeln herrnn Gregorÿ genant mit sambt seÿnem
anhang den kaÿser zůfahen. Aber der kaÿser wart gewarnet. der halben
sich obgemelter Gregoriůs mit seinem hawffenn zůsammen schlůg.
vermeint den kaÿser zůbetreffenn. Aber der kaÿser weret sic h garr
ritterlich. Schlůg sich vonn ÿn. vnd kam zů ainem thor aůs. mit gar
wenig lewthen. vnd der merer taill seÿnes Folcks blib in der Stat Rom
Also lonet das vndanckbar wildFolck dem Romischenn kaÿser seÿnerr
manchfeltigenn gnaden vnnd woltatt.

Darnach legt dieser Romischer kaÿser ein Raichstag gen Paůÿ. vnd
gebot allenn seinen Landen aůff wieder vor Rom zůzciehen. Aber als
etlich schreibenn hat sich der Romisch kaÿser nach oben berůrter
enporůng zů Rom. wider nach Tewtzschen Landen erhabenn.