Als nůn diss kaÿserr. Otto. Innen wart. zcog er vonn Rom hinweg.
gegen seinen Erblanden in Germanien. Vnd nachdem ÿm nach
gemeÿner vermůtůng vnnd wenůng von den Romern vergeben was. fůrn ÿm
in dem leib blattern aůff. der aůch etliche heraůs brachen.
Daůon er kranck wart. vnnd an diser kranckhait am Viervnndzweintzigstenn
tag des Jeners. ader als etlich habenn. am achten tag des hornůngs
Nach cristi gebůrt Taůsent vnnd Im andernn Ihar sein leben
endet. Ein schoner herr. Vnd ein kron des hailigen
Romischenn Raichs. Welchs abgang alle seine Lewth
mercklich erschrackenn. Vnd in grossem betrůbnis warnn. Vnd
sein tott wart So lang vonn seinen dinern verschwigen. bis
das Heer wider zůsammen versammelt wart. Vnd dieser
Romischer kaÿser hat als etlich schreibenn Neůnzehenn Ihar
das hailig Romisch Raich regirt. Als etlich ander haben Sÿbenzehen
Jhar. von welchen er ist Neůn Iar Romischer konig. vnnd acht
Iar Romischer kaÿser g ewest.