naÿget Also bracht hertzog Hainrich. den toten kaÿser gein Aůgsbůrg
Da er aůch sein eingeweÿde in Sant Vlrichs kirchen erlichen begrůb.
Vnnd gab zů seiner sele selickait hůndert hůfenn landes derselben kirchen
Darnach lies er den grossenn hawffen Folcks vonn ÿm abzciehen. vnd er
zcog mit dem toten kaÿser Inn seiner Stat aine. Welchen er aůch daselbst
gegenn Ache lies fůrenn. Als nůn der tot kaÿser gein Colnn am
hailigenn Palmtag gebracht. wart. er von dem ErtzBischoff heriberto gar
loblichenn angenůmmen Daselbst er aůch am Mantag in der
hailigenn karwochenn. wart in Sant Seůerins kirchen getragenn Aůff den
Dinstag zů Sannt Pantaleon. Am Mitwoch zů Sannt Gereon. Vnnd am
Grůn Dornstag zů San t peter. Da aůch von dem ErtzBischoff
heriberto des toten kaÿser vergebůng ertzaigt seiner sůnde.
Aůff den karFreitag wart der tot kaÿser gein Iůlch gefůrt Vnnd
kam aůff den hailigenn Osterabendt zů Ache aÿn. vnnd wart darnach
aůff den hailigenn Ostertag zů Ache in vnnser lieben frawen kirchen
mitten Im khor aůffs erlichst begrabenn. Diser kaÿserr
Otto ist aÿn solcher tůgentreicher Fůrst vnnd kaÿser gewest. Das er
billich mocht ewiglich beweÿnet werdenn. Also haben dreÿ kaÿser.
alle. Ottones. genant nacheinander das Romisch kaÿserthůmb regirt.

Etlich schreibenn das dieser Romischer kaÿserr seÿ Darůmb eÿn
Wůnder ader wůnderwerck der welt genant worden. das er
des hailigenn vnnd Grossen kaÿser karls grab geoffent hab.
vnnd darÿnnen wůnderliche ding gesehen vnnd befůnden.

Aůch findt man in etlichen Cronicken das diser Romischer kaÿserr
ist die gerechtickait der welt genant worden. Villeicht vmb
des willenn das ÿm die gerechtigkait vor allenn dingen geliebt hab.