Die zceit hat eÿnn Fraw Fůnff Sůn aůff aÿn mal geborn.

Beÿ diesenn tagen wart Lůdtgart Marggraůenn Eckharts von Meÿssen
tochter eÿnem herren eelich vertrawet. Weÿl nůn desselben
Frewlens vater solch haÿrat vermeint zůhindern. kam derselbig
herr aÿnmal sambt zweÿen Graůen gen Qůidlingbůrg. vnnd
fůhrt benants frewlen mit gewalt hinweg. vnd wiewol man ÿm
vleisig nachfolgt. doch kam er daůon. Aber aůff beclagůng der Eptissÿn
Mechtildt zů Qůidlingbůrg die das Frewlen ertzogen hett. wart ein tag
gen Magdebůrg dieser sachenhalben gelegt. Dahin diser herr das Frewlen
widerbracht der Eptissÿn zů Qůidlingbůrg zů Fůs fiell. Vnd ÿm.
vnd den die ÿm darzů geholffenn hettenn gnad erwarb.