Etlich schreibenn benanter Marggraff Eckhart seÿ zů Hÿldensheÿm
fůr ein Romischenn konig angenůmmen vnd gehalten wordenn.
Darnach zcog er gein Padebornn. da er dem Bischoff Rethario sein
fúrnemen ser entgegen vnnd mÿsfellig vermerckt. Vnnd erfůr
aůch das der tag gein Dÿnspůrg gelegt kain vorgang gehaben
mocht. Derhalben er vondannen nach Northeÿm zcog. in
die Stat des Graůen Seÿfrids. Vnnd als er dahin kůmmen was.
wart er mit grossenn Eren enpfangen. Aůch gebeten da zůbenachten.
Aůch gab ÿm in geheÿm daselbst die Grefÿn Adelÿnda zůerkennen wie
das sein eldiste Sone Seÿfrid vnnd Benno. mitsambt Graůen
Hainrich vnnd Graůen Vdo. vnd vil andern mer sich zůsammen
verschwornn hetten. ÿn vmbzůbrengen. Vnd wie sie damit
vmbgiengen solchs zůenden. Vnnd bat Marggraff Eckart gar
vleissiglich bis aůff den andernn tag da zůbleÿben Ader ann
eÿnander endt zůzciehenn. Daraůff Marggraff Eckhart.