der Grefÿnn gůtiglich diese antwort gab. Das er sein fůrgenůmmen
weg wider mocht noch wolt vmb ÿrer willenn vnterlassen. Vnd
zcog also von dannen. vnnd hett gar ein vleisigs aůfsehen aůff die
seinen. Die er aůch mit hohem vleis vermant Vnerschrocken zůsein
Wann er sah vonn ferns die feindt halten. Vnd wolt sich denselben
tag nicht mit ÿn schlagenn. Aber geredt ÿn ann ÿr hende mit den
feÿndenn aůff nechstfolgende nacht zůtreffenn.

Da nůn Marggraff Eckhart gein Poÿlde kůmmen was. Vnd was zů bett
gangenn. Lagen sein diener aůff dem nechsten poden beÿ ÿm vnnd
als sie hartschlieffenn fieln die feindt ein. vnnd erwerckten [lies: erweckten]
Marggraff Eckhart mit ÿrm vngestÿmmigen geschreÿ. Daůon
er aůch aůs dem bett aůffůr. Ein gar gering claÿd anzcog. Vnd den
feinden zůentwerden ein fenster aůffbrach. wiewol zů seÿnem
grossern nachtaÿl dann frůmmen. Also wůrden zwen tewre
Ritter. hermann. vnd Adolph vnd gar getrewe diener des Marggraůen
bis in den tot. zů stůndt vor der Cammernn erstochen wůrden.
Aůch wart der kaÿserlichenn Maiestat Camrer mit vil wůnden.